ספר ירמיהו פרק מג
1 וַיְהִי כְּכַלּוֹת יִרְמְיָהוּ לְדַבֵּר אֶל־כָּל־הָעָם, אֶת־כָּל־דִּבְרֵי יהוה אֱלֹהֵיהֶם, אֲשֶׁר שְׁלָחוֹ יהוה אֱלֹהֵיהֶם אֲלֵיהֶם; אֵת כָּל־הַדְּבָרִים הָאֵלֶּה׃ {ס} 2 וַיֹּאמֶר עֲזַרְיָה בֶן־הוֹשַׁעְיָה וְיוֹחָנָן בֶּן־קָרֵחַ, וְכָל־הָאֲנָשִׁים הַזֵּדִים; אֹמְרִים אֶל־יִרְמְיָהוּ, שֶׁקֶר אַתָּה מְדַבֵּר, לֹא שְׁלָחֲךָ יהוה אֱלֹהֵינוּ לֵאמֹר, לֹא־תָבֹאוּ מִצְרַיִם לָגוּר שָׁם׃ 3 כִּי, בָּרוּךְ בֶּן־נֵרִיָּה, מַסִּית אֹתְךָ בָּנוּ; לְמַעַן תֵּת אֹתָנוּ בְיַד־הַכַּשְׂדִּים לְהָמִית אֹתָנוּ, וּלְהַגְלוֹת אֹתָנוּ בָּבֶל׃ 4 וְלֹא־שָׁמַע יוֹחָנָן בֶּן־קָרֵחַ וְכָל־שָׂרֵי הַחֲיָלִים וְכָל־הָעָם בְּקוֹל יהוה; לָשֶׁבֶת בְּאֶרֶץ יְהוּדָה׃ 5 וַיִּקַּח יוֹחָנָן בֶּן־קָרֵחַ וְכָל־שָׂרֵי הַחֲיָלִים, אֵת כָּל־שְׁאֵרִית יְהוּדָה; אֲשֶׁר־שָׁבוּ, מִכָּל־הַגּוֹיִם אֲשֶׁר נִדְּחוּ־שָׁם, לָגוּר בְּאֶרֶץ יְהוּדָה׃ 6 אֶת־הַגְּבָרִים וְאֶת־הַנָּשִׁים וְאֶת־הַטַּף וְאֶת־בְּנוֹת הַמֶּלֶךְ, וְאֵת כָּל־הַנֶּפֶשׁ, אֲשֶׁר הִנִּיחַ נְבוּזַרְאֲדָן רַב־טַבָּחִים, אֶת־גְּדַלְיָהוּ בֶּן־אֲחִיקָם בֶּן־שָׁפָן; וְאֵת יִרְמְיָהוּ הַנָּבִיא, וְאֶת־בָּרוּךְ בֶּן־נֵרִיָּהוּ׃
7 וַיָּבֹאוּ אֶרֶץ מִצְרַיִם, כִּי לֹא שָׁמְעוּ בְּקוֹל יהוה; וַיָּבֹאוּ עַד־תַּחְפַּנְחֵס׃ {ס}
8 וַיְהִי דְבַר־יהוה אֶל־יִרְמְיָהוּ, בְּתַחְפַּנְחֵס לֵאמֹר׃ 9 קַח בְּיָדְךָ אֲבָנִים גְּדֹלוֹת, וּטְמַנְתָּם בַּמֶּלֶט בַּמַּלְבֵּן, אֲשֶׁר בְּפֶתַח בֵּית־פַּרְעֹה בְּתַחְפַּנְחֵס; לְעֵינֵי אֲנָשִׁים יְהוּדִים׃ 10 וְאָמַרְתָּ אֲלֵיהֶם כֹּה־אָמַר יהוה צְבָאוֹת אֱלֹהֵי יִשְׂרָאֵל, הִנְנִי שֹׁלֵחַ וְלָקַחְתִּי אֶת־נְבוּכַדְרֶאצַּר מֶלֶךְ־בָּבֶל עַבְדִּי, וְשַׂמְתִּי כִסְאוֹ, מִמַּעַל לָאֲבָנִים הָאֵלֶּה אֲשֶׁר טָמָנְתִּי; וְנָטָה אֶת־שפרורו (שַׁפְרִירוֹ) עֲלֵיהֶם׃ 11 ובאה (וּבָא) וְהִכָּה אֶת־אֶרֶץ מִצְרָיִם; אֲשֶׁר לַמָּוֶת לַמָּוֶת, וַאֲשֶׁר לַשְּׁבִי לַשֶּׁבִי, וַאֲשֶׁר לַחֶרֶב לֶחָרֶב׃ 12 וְהִצַּתִּי אֵשׁ, בְּבָתֵּי אֱלֹהֵי מִצְרַיִם, וּשְׂרָפָם וְשָׁבָם; וְעָטָה אֶת־אֶרֶץ מִצְרַיִם כַּאֲשֶׁר־יַעְטֶה הָרֹעֶה אֶת־בִּגְדוֹ, וְיָצָא מִשָּׁם בְּשָׁלוֹם׃ 13 וְשִׁבַּר, אֶת־מַצְּבוֹת בֵּית שֶׁמֶשׁ, אֲשֶׁר בְּאֶרֶץ מִצְרָיִם; וְאֶת־בָּתֵּי אֱלֹהֵי־מִצְרַיִם יִשְׂרֹף בָּאֵשׁ׃ {ס}