ספר יואל פרק ג
1 וְהָיָה אַחֲרֵי־כֵן, אֶשְׁפּוֹךְ אֶת־רוּחִי עַל־כָּל־בָּשָׂר, וְנִבְּאוּ בְּנֵיכֶם וּבְנוֹתֵיכֶם; זִקְנֵיכֶם חֲלֹמוֹת יַחֲלֹמוּן, בַּחוּרֵיכֶם, חֶזְיֹנוֹת יִרְאוּ׃ 2 וְגַם עַל־הָעֲבָדִים וְעַל־הַשְּׁפָחוֹת; בַּיָּמִים הָהֵמָּה, אֶשְׁפּוֹךְ אֶת־רוּחִי׃ 3 וְנָתַתִּי מוֹפְתִים, בַּשָּׁמַיִם וּבָאָרֶץ; דָּם וָאֵשׁ, וְתִימֲרוֹת עָשָׁן׃ 4 הַשֶּׁמֶשׁ יֵהָפֵךְ לְחֹשֶׁךְ, וְהַיָּרֵחַ לְדָם; לִפְנֵי, בּוֹא יוֹם יהוה, הַגָּדוֹל וְהַנּוֹרָא׃ 5 וְהָיָה, כֹּל אֲשֶׁר־יִקְרָא בְּשֵׁם יהוה יִמָּלֵט; כִּי בְּהַר־צִיּוֹן וּבִירוּשָׁלָיִם תִּהְיֶה פְלֵיטָה, כַּאֲשֶׁר אָמַר יהוה, וּבַשְּׂרִידִים, אֲשֶׁר יהוה קֹרֵא׃