ספר נחום פרק א
1 מַשָּׂא נִינְוֵה; סֵפֶר חֲזוֹן נַחוּם הָאֶלְקֹשִׁי׃
2 אֵל קַנּוֹא וְנֹקֵם יהוה, נֹקֵם יהוה וּבַעַל חֵמָה; נֹקֵם יהוה לְצָרָיו, וְנוֹטֵר הוּא לְאֹיְבָיו׃
3 יְהוָֹה, אֶרֶךְ אַפַּיִם וגדול־ (וּגְדָל־) כֹּחַ, וְנַקֵּה לֹא יְנַקֶּה; יהוה, בְּסוּפָה וּבִשְׂעָרָה דַּרְכּוֹ, וְעָנָן אֲבַק רַגְלָיו׃
4 גּוֹעֵר בַּיָּם וַיַּבְּשֵׁהוּ, וְכָל־הַנְּהָרוֹת הֶחֱרִיב; אֻמְלַל בָּשָׁן וְכַרְמֶל, וּפֶרַח לְבָנוֹן אֻמְלָל׃
5 הָרִים רָעֲשׁוּ מִמֶּנּוּ, וְהַגְּבָעוֹת הִתְמֹגָגוּ; וַתִּשָּׂא הָאָרֶץ מִפָּנָיו, וְתֵבֵל וְכָל־יֹשְׁבֵי בָהּ׃
6 לִפְנֵי זַעְמוֹ מִי יַעֲמוֹד, וּמִי יָקוּם בַּחֲרוֹן אַפּוֹ; חֲמָתוֹ נִתְּכָה כָאֵשׁ, וְהַצֻּרִים נִתְּצוּ מִמֶּנּוּ׃
7 טוֹב יהוה, לְמָעוֹז בְּיוֹם צָרָה; וְיֹדֵעַ חֹסֵי בוֹ׃
8 וּבְשֶׁטֶף עֹבֵר, כָּלָה יַעֲשֶׂה מְקוֹמָהּ; וְאֹיְבָיו יְרַדֶּף־חֹשֶׁךְ׃
9 מַה־תְּחַשְּׁבוּן אֶל־יהוה, כָּלָה הוּא עֹשֶׂה; לֹא־תָקוּם פַּעֲמַיִם צָרָה׃
10 כִּי עַד־סִירִים סְבֻכִים, וּכְסָבְאָם סְבוּאִים; אֻכְּלוּ, כְּקַשׁ יָבֵשׁ מָלֵא׃
11 מִמֵּךְ יָצָא, חֹשֵׁב עַל־יהוה רָעָה; יֹעֵץ בְּלִיָּעַל׃ {ס}
12 כֹּה אָמַר יהוה, אִם־שְׁלֵמִים וְכֵן רַבִּים, וְכֵן נָגֹזּוּ וְעָבָר; וְעִנִּתִךְ, לֹא אֲעַנֵּךְ עוֹד׃
13 וְעַתָּה אֶשְׁבֹּר מֹטֵהוּ מֵעָלָיִךְ; וּמוֹסְרֹתַיִךְ אֲנַתֵּק׃
14 וְצִוָּה עָלֶיךָ יהוה, לֹא־יִזָּרַע מִשִּׁמְךָ עוֹד; מִבֵּית אֱלֹהֶיךָ אַכְרִית פֶּסֶל וּמַסֵּכָה אָשִׂים קִבְרֶךָ כִּי קַלּוֹתָ׃ {פ}