ספר יואל פרק ד
1 כִּי, הִנֵּה בַּיָּמִים הָהֵמָּה וּבָעֵת הַהִיא; אֲשֶׁר אשוב (אָשִׁיב) אֶת־שְׁבוּת יְהוּדָה וִירוּשָׁלָיִם׃ 2 וְקִבַּצְתִּי אֶת־כָּל־הַגּוֹיִם, וְהוֹרַדְתִּים, אֶל־עֵמֶק יְהוֹשָׁפָט; וְנִשְׁפַּטְתִּי עִמָּם שָׁם, עַל־עַמִּי וְנַחֲלָתִי יִשְׂרָאֵל אֲשֶׁר פִּזְּרוּ בַגּוֹיִם, וְאֶת־אַרְצִי חִלֵּקוּ׃ 3 וְאֶל־עַמִּי יַדּוּ גוֹרָל; וַיִּתְּנוּ הַיֶּלֶד בַּזּוֹנָה, וְהַיַּלְדָּה מָכְרוּ בַיַּיִן וַיִּשְׁתּוּ׃ 4 וְגַם מָה־אַתֶּם לִי צֹר וְצִידוֹן, וְכֹל גְּלִילוֹת פְּלָשֶׁת; הַגְּמוּל, אַתֶּם מְשַׁלְּמִים עָלָי, וְאִם־גֹּמְלִים אַתֶּם עָלַי, קַל מְהֵרָה, אָשִׁיב גְּמֻלְכֶם בְּרֹאשְׁכֶם׃ 5 אֲשֶׁר־כַּסְפִּי וּזְהָבִי לְקַחְתֶּם; וּמַחֲמַדַּי הַטֹּבִים, הֲבֵאתֶם לְהֵיכְלֵיכֶם׃ 6 וּבְנֵי יְהוּדָה וּבְנֵי יְרוּשָׁלָיִם, מְכַרְתֶּם לִבְנֵי הַיְּוָנִים; לְמַעַן הַרְחִיקָם מֵעַל גְּבוּלָם׃ 7 הִנְנִי מְעִירָם, מִן־הַמָּקוֹם, אֲשֶׁר־מְכַרְתֶּם אֹתָם שָׁמָּה; וַהֲשִׁבֹתִי גְמֻלְכֶם בְּרֹאשְׁכֶם׃ 8 וּמָכַרְתִּי אֶת־בְּנֵיכֶם וְאֶת־בְּנוֹתֵיכֶם, בְּיַד בְּנֵי יְהוּדָה, וּמְכָרוּם לִשְׁבָאיִם אֶל־גּוֹי רָחוֹק; כִּי יהוה דִּבֵּר׃ {ס} 9 קִרְאוּ־זֹאת בַּגּוֹיִם, קַדְּשׁוּ מִלְחָמָה; הָעִירוּ הַגִּבּוֹרִים, יִגְּשׁוּ יַעֲלוּ, כֹּל אַנְשֵׁי הַמִּלְחָמָה׃ 10 כֹּתּוּ אִתֵּיכֶם לַחֲרָבוֹת, וּמַזְמְרֹתֵיכֶם לִרְמָחִים; הַחַלָּשׁ, יֹאמַר גִּבּוֹר אָנִי׃ 11 עוּשׁוּ וָבֹאוּ כָל־הַגּוֹיִם מִסָּבִיב וְנִקְבָּצוּ;
שָׁמָּה הַנְחַת יהוה גִּבּוֹרֶיךָ׃
12 יֵעוֹרוּ וְיַעֲלוּ הַגּוֹיִם, אֶל־עֵמֶק יְהוֹשָׁפָט; כִּי שָׁם, אֵשֵׁב לִשְׁפֹּט אֶת־כָּל־הַגּוֹיִם מִסָּבִיב׃ 13 שִׁלְחוּ מַגָּל, כִּי בָשַׁל קָצִיר; בֹּאוּ רְדוּ כִּי־מָלְאָה גַּת, הֵשִׁיקוּ הַיְקָבִים, כִּי רַבָּה רָעָתָם׃
14 הֲמוֹנִים הֲמוֹנִים, בְּעֵמֶק הֶחָרוּץ; כִּי קָרוֹב יוֹם יהוה, בְּעֵמֶק הֶחָרוּץ׃ 15 שֶׁמֶשׁ וְיָרֵחַ קָדָרוּ; וְכוֹכָבִים אָסְפוּ נָגְהָם׃ 16 וַיהוה מִצִּיּוֹן יִשְׁאָג, וּמִירוּשָׁלָיִם יִתֵּן קוֹלוֹ, וְרָעֲשׁוּ שָׁמַיִם וָאָרֶץ; וַיהוה מַחֲסֶה לְעַמּוֹ, וּמָעוֹז לִבְנֵי יִשְׂרָאֵל׃ 17 וִידַעְתֶּם, כִּי אֲנִי יהוה אֱלֹהֵיכֶם, שֹׁכֵן בְּצִיּוֹן הַר־קָדְשִׁי; וְהָיְתָה יְרוּשָׁלָיִם קֹדֶשׁ, וְזָרִים לֹא־יַעַבְרוּ־בָהּ עוֹד׃ {ס}
18 וְהָיָה בַיּוֹם הַהוּא יִטְּפוּ הֶהָרִים עָסִיס, וְהַגְּבָעוֹת תֵּלַכְנָה חָלָב, וְכָל־אֲפִיקֵי יְהוּדָה יֵלְכוּ מָיִם; וּמַעְיָן, מִבֵּית יהוה יֵצֵא, וְהִשְׁקָה אֶת־נַחַל הַשִּׁטִּים׃ 19 מִצְרַיִם לִשְׁמָמָה תִהְיֶה, וֶאֱדוֹם לְמִדְבַּר שְׁמָמָה תִּהְיֶה; מֵחֲמַס בְּנֵי יְהוּדָה, אֲשֶׁר־שָׁפְכוּ דָם־נָקִיא בְּאַרְצָם׃ 20 וִיהוּדָה לְעוֹלָם תֵּשֵׁב; וִירוּשָׁלָיִם לְדוֹר וָדוֹר׃ 21 וְנִקֵּיתִי דָּמָם לֹא־נִקֵּיתִי; וַיהוה שֹׁכֵן בְּצִיּוֹן׃